. . السلآم عليكم
بمآ انه امس كان اليوم العالمي لمتلآزمة داون : 21 مارس
حبيت اتكلم شوي عن المرض , و كيف نتعامل مع الاشخاص و الاطفال المصابين فيه ..
لان الاغلب مايعرف المرض بشكل صحيح , و ممكن فاهمه غلط .
عشان كذا عملت كم سيرش عنه , و تاكدت من المعلومات اللي عندي وزدت عليها .
و فكرت انو انزلها بالبلوق و بس يلا نبدأ : -
اول شي ايش هوا متلازمة داون :
هوا مرض من الاعاقات العقلية " التخلف العقلي : و التخلف العقلي يكون : حالة من عدم تكامل نمو خلايا المخ، أو توقف نمو أنسجته من ايام الولادة أوفي السنوات الأولى من الطفولة لسبب والتخلف العقلي مومرض مستقل أو معين، هو مجموعة أمراض كلها يكون فيها انخفاض درجة ذكاء الطفل.. مقارنة بمعدل الذكاء العام، وعجز في قابليته على التكيف.
متلازمة داون وأنواعها:
كلمة متلازمة داون إلى مجموعة من العلامات والسمات التي توجد وتبان مجتمعة في وقت واحد وهو واحد من أسباب التخلف العقلي الشائعه ، و يكون احيانا تباطؤ في النمو العقلي والحركي، و مو ضروري يكون بالضرورة حالة وراثية . متلازمة داون تسمت بهذا الاسم على الطبيب جون داون , كانو بالاول يسمونهم منغوليين , بس منغوليا قدمت شكوى و اظطروا يسموها متلازمة داون .
حتكلم شوي عن مرضى متلازمة داون :
اجتماعيين اغلبهم إحساسهم مرهف ، يحبوا المرح والانشراح والاستمتاع بالأشياء وحب التقليد ، وفيه منهم يخجلوا قدام الزوار و الناس الغرب غير اهلهم ، وفي بعضهم يتعاطف مرا ويحب الناس الاجانب عنهم ، يحبوا يلعبوا بشكل كبير ، ما يحبو يكونوا بمكان ضيق ومقفل لوقت طويل ويحبوا الأماكن المفتوحة لانهم يحبوا ينطلقوا ويكتشفوا العالم .
كيف نتعامل معهم :
انا حابة اتكلم عن كيف نتعامل مع اي معاق بالحياة ان كان جسديا او عقليا , جد الموضوع ذا يباله تثقيف و نشر مرا اسلوب الناس عندنا خاصة بالدول العربية اسلوب سيء معهم يعني تشوفي النظرات الموجهة لهم و الاستغراب و حالات اللطف الشديدة اللي تنزل عليهم بشكل باين وواضح انهم حزنانين عليهم , جد بالنسبة ليا انا اعرف ناس رجال و حرمته معاقين جسديا و عندهم اولاد و كله , المهم الرجال وحرمته راحو لامريكا مدة ماني مفتكرة ليش بس اظن لعلاج او شي كدا بعدها ما قدروا يرجعو هنا الا بالاجازات و بس مهم قادرين يتعايشوا هنا بسبب التعامل , يعني بشكل انهم بعدوا عن اهلهم كلهم واولادهم عشان هناك التعامل افضل مافيه زينا يمكن مو موضوعه هنا بس ابين لكم كيف جد المجتمع يباله تثقيف بالموضوع دا .
المعاق جسديا حنتعامل معاه كاي شخص طبيعي باستثناء انو راح نساعده باللي مايقدر عليه , نعزز معنوياته نعلمه انو انسان طبيعي زيه زينا بس اللهم ناقصه حاجات و زايدة عنده حاجات محد كامل غير ربنا , يعني جد يمكن المعاق هذا عنده امكانيات ماتلقيها بالانسان الطبيعي , ربي ياخد شي ويعطي شي . و المعاق العقلي نفس الوضع بس طبعا راح نعامله ع حسب قدراته العقلية . مانجيب له شي صعب ونقول م يفهم و لا نجيب شي سهل مرا ونستهين بقدراته , لازم نعززهم نديهم امل بالحياة ان ربي زي ما اخذ بيعطي , وكل هذا طبعا من مرض من تعامل الناس له اجر من ربي .
+ في النهاية حابة اعرض لكم دا الفيلم الصغير عن اليوم العالمي للمعاق اسمه { مُجحِفون ..
* بس صراحة ماني عارفة ايش اقول كمان م احس اني وفيت الموضوع حقه خصوصاَ ان ما قد تعاملت فعليا مع مريض متلازمة داون . نسأل ربي لهم الشفاء العاجل , و لكل اهل معاق الله يعطيكم العافية ع كل مجهودكم كله باجر من ربي باذن الله ..
- استودعتكم ربي , انتبهوا لنفسكم , واصلوني ع تويتر :
@roudis_blog
ليست هناك تعليقات:
إرسال تعليق