Make up (1) :*

_

السلام عليكم ..

كيف حالكم ؟ ان شاء الله طيبين ..

باذن الله هذا آخر بوست قبل الاختبارات , و ما حنزل بوستات الا بعد الاختبارات ..

هذا البوست حيكون اول بوست ب سلسلة تتكلم عن الميك اب واساسياته . و طرقه وكذا ان شاء الله يعجبكم 

اول شي حنبدا باساسيات الميكاب ..

بالبداية لازم تعرفي نوعية بشرتك حيساعدك كثير بانك تعرفي تختاري الميك اب المناسب لك ويبان بالشكل المناسب المثالي ..

اول شي انواع البشرة ثلاثة انواع اللي هيا : جافة , دهنية , مختلطة ..

البشرة الدهنية : تتميز بلمعانها ؛ بسبب انو نشاط الغدد الدهنية فيها اكبر وتفرز دهون اكثر فتكون قابليتها للدهون اكبر من الانواع الثانية ف عشان كذا تكون الرؤوس السودا فيها اكثر عادةَ .

البشـره الجافه : تتميز انو يكون نشاط الغدد الدهنية اقل ف تبان التشققات و الخطوط بشكل اكبر وتتقشر بشكل اسرع , اصحبا ذي البشرة معروف انهم يعجزوا بسرعه , فاذا م اهتموا بيخسرون بشرتهم ,  لازم تكون العناية فيها مستمرة عشان م تنعدم ..

البشرة المختلطة : يكون فيها اماكن جافة و اماكن دهنية يزيد فيها افراز الدهون وعادة تكون منطقة ال T zone  اللي هيا من عند الانف و الجبهة . 

اول شي حنبدا فيه اللي هوا البيس base ..هو يهيئ البشره للمكياج ويخلي لونها مشرق و يستخدم على حسب نوع البشرة 

يمدحون بيس ميك اب فور ايفر وبيس ماك . 

اول واحد الاخضر : يزيد الاحمرار بالبشرة .

البنفسجي يغطي الاصفرار و الشحوب , و يبيض البشرة ..

البيس الفوشي : يغطي البهتان بالبشرة ويستخدموه اكثر شي للبشرة البيضا ..

البيس الاورنج : يعطي لوك حلو للبشرة السمرا ويديها رونق وجمال ..

البيس الاصفر : يستخدموه في محلات الاضاءة القوية عشانه يمتص الضوء يستخدموه بتصوير الافلام و المسلسلات كثير :*

البيس الازرق :  يستخدموه للبشرة الباهته اكثر شي اللي تكون مرا بيضا .

استخدام البيس مثل الفونديشن (الاساس) يكون عادي كريم يتوزع قبل الفونديشن بربع ساعه يحافظ على الفونديشن ويعطي البشرة حيوية  , و لازم تستعملي اللي يناسب بشرتك  ..

* ثاني شي الفونديشن اللي هوا الاساس ..

كل بنت تحتار ايش اللي يناسب بشرتها او الدرجه اللي تناسبها , ونسأل ونجرب ويطلع م ناسب درجتنا وهذا غلط لازم قبل م نشتري نعرف مشاكل بشرتنا من احمرار وحبوب او بهتان ..
في غلط الكل يسويه تقريبا اللي هوا لما نجي نشتري فونديشن نجربه على يدنا وهذا اكبر غلط لان اليد عادة لونها غير عن لون البشرة لانها تتعرض بشكل اكبر للشمس فتكون معرضة للاسمرار بشكل اكبر , الافضل نجرب ف اطراف الخد نشوف لو ناسب ولا .. طبعا عندنا كان اللي يبيعون رجال م كنا نقدر لكن الحبن اغلب محلات الميك اب نسائية وفي منها مغلقة مايدخلوها رجال ابدا ف توفرت لنا الفرص ان نجرب على خدنا .. 

ثاني حاجة لما نجي نختار الاساس لازم نعرف نبى تغطيته نهارية او مسائية خفيفة او ثقيلة
اشوف كثير يحطون فونديشن غلط يكون حق مناسبات في وقت صباحي , وهو غلط ككبيييييير لان فونديشن السهرة فرق بينه وبين فونيشن الصباح

الصباحي يكون قريب للبشرة و طبيعي تغطيته مي مرا كبيرة   اما للسهرات يكون افتح بدرجة مو اكثر و مناسب واذا بشرتي فيها مشاكل كثيرة اخذ فونديشن تغطيته قوية تخفي العيوب ..
طريقة توزيعه بالفرشة , بس انتبهوا بعض الفرش تبين خطوط بالبشرة او الاسفنجة او اليد ..

ثالث شي اللي هوا الكونسيلر , خافي العيوب . 

  

- الكونسيلر هو مخفي العيوب يعمل على تغطية الهالات السوداء او الحبوب او الاحمرار والحروق البسيطه ..

تقريبا الافضل حاليا , تبع ميك اب فور ايفر , اللي بالصورة فوق ..

و للاستخدام اليومي في حق جارنييه جميل و خفيف مو مرا اوفر , ب شي و ثلاثين اتوقع 

الاماكن اللي نحط فيها الكونسيلر , اعلى الشفة عند الانحنائة وتحت الشفة بشكل بسيط وتحت العيون و اماكن الحروق و الحبوب ..

رابع الشي الباودر :

يحطوها لثبيت الفونديشن و تثبيت الميك اب لو م حيطناها راح يتقطع الفونديشن او يكوون باهت ويروح .

البشرة الدهنية الافضل لها البودرة المائية عشان تثبت الاساس وما تمصه البشرة

اما الجافة فالافضل لها اللوس باودر اللي م تكون مضغوطة او اللي مضغوطة , قبل ما نحط الباودر لازم يكون الاساس موزع بشكل مضبوط ..

هذا كل شي للبوست هذا , ان شاء الله يعجبكم ..

اعطوني رايكم ع @roudis_blog 

البوست الجاي حيكون ان شاء الله عن ميك اب العيون و اساسياته .. 

ادوني اقتراحاتكم للبوستات 

و بس انتبهوا لنفسكم استودعتكم ربي ..

Jeddah fashion days :*

-

السلام عليكم ..

مسآء الخير . و انتهى الويكند بسرعهه .. اتمنى انو كان ويكند جميل لكم زي ما كان ليا ~ 

اول شي انا يوم الاثنين عرفت عن الفاشن دايز اللي حيصير بجدة ..

و كان حيصير 7 و8 و 9 من شهر may وحيكون يوم 10 و 11 مفتوح المعرض تتفرجوا فيه و تششتروا ادا تحبوا .. بس الايام اللي قبل هيا اللي فيها عروض الازياء .. و كان بستارز افينيو بالدور الثاني كان نسائي . رسوم الدخول ب 150 من محل maisson bo m  و هوا الراعي الرسمي للحفل  من نفس المول موجود المحل تقدري تشتري و انتي رايحة :*

المهم انا اول م رحت ماكان فيه ناس كثير بس اللي من الميديا سوشيال تقريبا كلهم بلوقرز او يويتوبرز دخلت صورت بالبداية بعدين جات الجميلة جود هيا بلوقرز و يوتيوبرز .. هذا اكاونتها ادا حابين تتعرفوا عليها @7mmosa

وجلسنا مع بعض شويا بعدين نطالع نشوف وحدا جميلة لابسة طوق ورد و احنا عارفين انو جوجو كاتبة اللي جاية حتعرفني من طوق الورد حقي وحاطة صورته , طالعت فيني جود قالت هذه جوجو قلتلها ايوا هيا و رحنا سلمنا عليها ماشاء الله البنت ياناس و اخلاق وكل شي جميل بالحياة .. و اللي يقول عنها مدلعة شي ثاني ترا مو مدلعة ولا شي ممكن انا كنت اقول كدا بس ابدا لما شفتها عرفت انو هيا كذا لا تتصنع ولا شي و اساسا شخصيتها جميلة تدخل القلب بسرعه .. @jayscherry 

و جوجو عرفتنا على صحباتها يارا و خديجة " برضو جميلين ماشاء الله  يدخلوا القلب بسرعه ..

و بعدين اتعرفنا على الجميلة هبه @f_bebo  ماشاء الله تبارك الله صوتها بحته جمممميلههه وشخصيتها حلوا جدا .. اتشرفت فيها

و شفت كمان اميرا @amiraa_88 و شفت @LadyMonyAna1

المهم خلاص م بكمل كثرت كلام الصور تحكيلكم ..

, و بس اتمنى تكون عجبكم الايفنت والتغطية عنه ..

انتبهوا لنفسكم استودعتكم ربي

ادوني رايكم : roudis_blog

بحفظ الرحمن ..

Jeddah fashion days yyyyyyyaaay ♥♥♥♥

السلام عليكم


كيف حالكم ان شاء الله طيبين

في ايفنت جممممميل حيحصل بجدة اللي هوا
JEDDAH FASHION DAYS

ايام الموضة بجدة في ستارز ايفينيو من 7 ماي الى 11

ان شاء الله ححضر اتمنى اني اشوفكم هناك *
هنا جوجو اتكلمت عنه لما كان بالرياض
https://www.youtube.com/watch?v=o5N52BDkqM4&feature=youtube_gdata_player


و بس السلام عليكم استودعتكم ربي
@roudis_blog

my favorites :*

سلام عليكم ..
مسآء الخير . كيفكم مع الاجواء الجميلة اللي ماشفناها لسا بجدة :(



هذا البوست عن الاشياء المفضلة عندي لدي الفترة

في ماركة انا م اعرف كيف اشتريت منها و لا ايش علمني عليها انا ما ادري بس انها جميلة جميلة جميلة لين بكرا 3>
الماركة اسمها Deborah .
اشتريت منها روج شي عجيب م كنت عارفه قيمته الا تو اكتشفت انو جدا جميل , و ماشاء الله ثابت غير لونه الجميل , غير انه مات و م ينشف الشفايف زي الباقية م تسوي . المهم درجته 05
وهذي صورته 

المهم اللون فضيع جدا :( م كنت اتوقع بيوم اني اتجرا و احط لون كدا لدرجة لما اشتريته كنت احس اني اضحك ع نفسي لاني عارفه اني م بحطه 
بس سبحان الله فجأة راح الحيا سرت احط اشياء جدا جريئة المهم انو جميل اتوقع تلقونه بالدرق ستور انا اخدته من سنتر بوينت فرع المروى على م اظن ~

م افتكر سعره بس اتوقع تقريبا انو ب 60 وشي 

ثاني هذا البلشر اللي انا متيمة بحبه :( مرا حلو يناسب اي درجة روج يبان كذا جميل مرا من ريميل لندن لونه مات مافيه اي شيمر 
درجته 220 اسمه madeira برضو بسنتر بيونت تلقونه اظن سعره ب 40 وشي 

كالعادة الفرشة حقته معفنه و خشنة وتجرح وكل شي سيء بالحياة 


ثالث شي شادو واضاءة من ريميل برضو " علقت ع ريميل دي الفترة "
اسمه glam eyes 001 black cap

للحين تجاربي مع اي شادو فاشلة ف عشان كدا م جربت الشادو بس جربت الاضاءة و جميلة مرا " بس طبعا فرشته سيئة ..

وكمان هذا الفونديشن جميل جدا من ريميل برضو 

جميل للمناسبات البسيطة يعني لان تغطيته مي مرة اوفر و خفيف مو ثقيل عالبشرة يدي منظر طبيعي كاتبين عليه ثباته 25 ساعه بس م اتوقع انه 25 ساعه هوا ثابت يعني اقصى شي جربت 5 ساعات .

الدرجة اللي ناسبتني 103 اسمه rimmel lasting finish foundation 

كمان هذه البودرة من بدي شوب للحواجب جميلة جدا و ثابته وتبان تقريبا طبيعية 

ب 60 ريال اتوقع  لا اوصيكم اول م تشترونها ارموا الفرشة بالزبالة على طول :)

في منها كم درجة انا عندي هذه الدرجة 

وكمان هذه المجموعة جدا جميلة من مكياجي اسمها i mascara 

جاتني هدية من شي جميل انا مرا احبو :( ..

المهم المجموعة مرا جميلة فيها 4 مسكرات هذا كلامهم فالموقع عنها 

دائماً ما كانت المسكارا هي آخر لمسة لإستكمال الإطلالة، وهذه الخطوة أما تناسب الإطلالة وتجعلها مذهلة أو تخربها تماماً. ولذلك بوجود هذا الطقم الذي يحتوي على ثلاث مسكارات كل واحدة منها تمنحك الخيار في الحصول على الإطلالة التي تريدينها. فواحدة تمنحك رموش مقوسة! والأخرى تمنحك رموش طويلة ! والثالثة تمنحك رموش كثيفة! أما المسكارا الرابعة فهي التي تجعل جميع هذه الإطلالات ثابتة طوال اليوم لأنك بإستخدامها تضيفين طبقة مقاومة للماء تحافظين بها على الإطلالة التي تريدينها. -

اخر شي هوا اللي اكشن من جد , روج من ريميل لندن برضو اسمه starry eyed 128

باين بالصورة افتح شوي , ترا جد بالبوست ذا اكتشفت اني سرت مرا جريئة بالميكاب :*

و بس هذه الاشياء الجميلة للميكاب حاليا :( 3>

انتبهوا لنفسكم استودعتكم ربي 

واصلوني ع تويتر @roudis_blog

ب حفظ الرحمن ..

يلا نقرأ "

السلام عليكم ..
-

صباح الخير ..
إن شاء الله كلكم بخير ..

قبل مدة تقريباَ فتح معرض الكتاب بالرياض , و كثير قالو انو كان جميل وكذا ..

..ح اهرج ع راسكم اليوم مرآ كثير استحملوني ..
بالبداية ترآ انا انسانة ملولة مممرا ومزاجية :) ~
يعني ممكن يعجبني شي اليوم وبكرا م يعجبنني ولا اطفش منه ..
حتقولو ايش دخل . انا اقولكم انا انسانة ع قد م اشتري كتب م كنت اكملها ابدا اطفش و اطنش يعني ممكن اقرا كم صفحة بعدين اسيب الكتاب اسبوعين و ارجع ابداه من البداية لاني نسيت اللي قراته ..
ذي الفترة لما سرت احاول اكمل الكتب م القى وقت :| و بالاصح لان وقتي مو منظم يعني لو كان عندي اختبار اليوم اللي قبله مايمديني اسوي اي شي غير اني اذاكر , و اللي مأثر كمان البيبي يعني سار زي المويا بالنسبة لي :)
بس حسوي حفلة لاني كملت تقريبا 3 كتب ب شهر ونص يمكن .. ترا مو انجاز الا ليا لان الناس الطبيبعين يخلصون الكتب اللي انا اخلصها باسبوع بالكثير ..

اول كتاب خلصته اللي هوا :
كخة يا بابا .. ل عبدالله المغلوث
هذا الغلاف حقه ..

الكتاب نقد للظواهر الاجتماعية في المجتمع الخليجي , السعودي بالتحديد ..
الكتاب سهل وسلس جدا , يحكي عن مواقف مر فيها الكاتب وكيف خرج منها ..
واقعي جداَ , يتكلم عن سلبيات المجتمع صراحةَ اتمنيت لو انه اتكلم عن بعض الايجابيات عشان يكون في عدل بالموضوع , وعشان لما احد اجنبي يمسك الكتاب ما ياخذ فكرة سيئة عن مجتمعنا , لان هنا مو مذكورة الايجابيات ..
المواضيع اللي مكتوبة مواضيع مهمة لرقي المجتمع واصلاحه , يعني في موضوع مرا شدني اللي هوا كيف مجتمعنا ما يتقبل التقدم بالسن و دخول مرحلة الشيخوخة , بالمقارنة مع المجتمعات الثانية مثل الغرب كيف تقبلو الموضوع و استغلوا هذه المرحلة في التعلم  و تخلصهم من القيود و ما اهملوا نفسهم ..
وكيف ان مجتمعنا يهتم للظاهر يهتم للون و الجنسية و الاصل , كيف ان الوافدين عندنا المفروض ماياخذوا رواتب اكثر من المواطنين حتى لو كانو يشتغلوا اضعاف المواطن , كيف نظرة المجتمع لهم ..
واتكلم ان كيف نزرع الاخلاق العالية في الاطفال .
الكتاب فيه مصداقية في النقل و كلامه واضح وسهل جدا .. والكتاب جدا صريح رغم ان الكاتب سعودي مننا و فينا , يعني اتكلم عن اشياء ترجعنا لورا , لكن صراحة اتمنيت انو يكون فيه حلول او شي ايجابي عشان يساعدنا على التغير لان كلامه اساسا يجبرنا على التغير .. لان ممكن اي قارئ لهذا الكتاب ممكن يكون فيه هذ السلبيات .
صراحة جدا استمعت بهذا الكتاب ..

هذه اقتباسات من الكتاب :

ثاني كتاب اللي هوا :
بيكاسو و ستار بكس
للكاتب الاماراتي ياسر حارب :*

اول شي اسم الكتاب يشد ويلفت الانتباه نوعاَ ما بالبداية راح تستغربوا وكذا لكن بعدين راح تفهموا ان الكاتب حط بيكاسو و ستار بكس كنموذج بشكل بسيط يوضح كيف هما اثروا علينا بشكل جميل و بشكل هادي و كيف وافقنا على قناعاتهم و قوانينهم رغم اننا نقدر اننا نرفض , الكاتب قاس النماذج على واقع حياتنا زي مثلا كوفي ستار بكس تقريبا هوا مواكب للحياة السريعة اللي احنا عايشينها لما نجي نختار الكوفي اللي احنا نباه كيف تتعدد الخيارات قدامنا رغم انها خيارات بسيطة الا انها زي الخيارات المهمة اللي تمر علينا , تكون خيارات حقيقية اذا احنا اخترناها لانها تعكس رغبتنا احنا و طموحنا  , و تكون خيارات كاذبة لما غيرنا يختاروا لنا . اما بيكاسو الكاتب ياسر حارب " وصف فن بيكاسو بالفن الغريب لكن رغم هذا انفرض علينا فنه , لازم نبدي اعجابنا و احترامنا قدام لوحاته حتى لو مافهمناها او م عجبتنا ؟ لان لو قلنا ما عجبتنا بنكون ما يهمنا الابداع و لا نتذوق الفن ..

من اكثر المواضيع اللي شدتني بالكتاب هذا الموضوع اللي هوا : " القلم الاحمر  "
اتكلم كيف اثر القلم الاحمر بحياتنا و نفسيتنا من صغرنا بداية من المدرسة , وحتى بعد المدرسة باعتباره لون الخطر , و اللون اللي يشير لك ان توقف . اقترح الكاتب اننا نستبدل القلم الاحمر بالاخضر لانه يرمز للسلام وهوا لون الشعب وراية الاسلام . الموضوع شدني لانه غريب
ثاني موضوع شدني اللي هوا : " ماذا لو نسينا تواريخ ميلادنا "
اتكلم عن قناعة المجتمع انو كل ماشاف تاريخ ميلاده يجيه شعور انه قرب من النهاية , و يقل بقلبه الامل . قدم الكاتب اقتراح اننا ننسى تواريخ ميلادنا و نسخر حياتنا طولت او قصرت لعمل اشياء ناجحة , تبقى و يطول اثرها لبعد مانموت ..

* الكتاب جميل جميل جميل بشكل مرا كبير ...

هذه اقتباسات منه : 

ثالث كتاب مو كتاب كتاب . ديوان شعر لبدر بن عبدالمحسن . 

اسمه " ومض " 

الديوان شي جميل جدا بشكل م تتصورونه من تصميم من محتوى من رسومات كلها جميله ما اقدر اتكلم عنه ابدا بس انتوا شوفو اقتباسات منه ..

وبس خلصت .. 

اتمنى يعجبكم البوست . 

ادوني ارائكم . و واصلوني ع تويتر 

@roudis_blog

انتبهوا لنفسكم استودعتكم ربي *

بحفظ الرحمن ..